بسم الله الرحمن الرحيم

فكرة الموقع
 
الموقع هو عمل تطوعي

مشاكل مصر كتير - في الشارع والصحة وكل مجالات الحياة
إتكلمنا كتير في التوك شو والجرايد والإنترنت - ولقينا بالفعل حلول وفيه حاجات اتحلت وإتطبقت وفيه حاجات حلها موجود على الورق أو على الرف وفيه حاجات لسه متحلتش
ولثقتي أن مصر قد ما فيها مشاكل بمختلف أنواعها - انا واثق جدا ان فيها مبدعين وحلالين مشاكل .
ففكرت أنشئ موقع هدفه هو تجميع المشاكل الي بتواجهنا وتواجه مصر ووضعها وتصنيفها بالموقع  ووضع طريقة للجمهور العادي والشباب والإداريين والمهندسين والدكاترة
 و” وكل الشعب المصري “  بأن يضع مقترحاته لحل هذه المشاكل في مكان واحد منظم يسهل على الغير استخدامه من لجان شعبية محليات مسؤولين او حتى اشخاص.

لو مجلس الشعب هيتكلم على مشكلة مع الصحة أو المرور أو سياسة أو أو .. ممكن يلاقي المشكلة هنا وحلولها هنا - يبقى لما يعمل طلب إحاطة يبقى معاه الحلول يعرضها على الوزير أو المسؤول مباشرة بدل ما المشاكل متبعتره في وسائل مختلفة والحلول تايهة معاها.
 
يعني مثلا .. واحد من المصريين دخل الموقع وكتب على مشكلة زحام في الميدان الفلاني بمدينة نصر - المشكلة ستعرض
والزائرين يضعوا حلول مثلا رأوها في اوروبا أو الخليج أو منطقة تانية بمصر أو سمعها في التلفزيون او الراديو واكثر الحلول واقعية وأقلها تكلفة وأكثرها ترشيح من الزوار تبقى واضحة
يوم ما المسؤولين يفتكروا يحلوا المشكلة دي .. يبقى الموقع جاهز بالمشاكل والحلول العملية .. أكيد هيكون فيه حلول وهمية وغير واقعية .. عادي سيتم تجاهلها ويتم إختيار الأفضل من خلالكم
 
أنا واثق وكلكم واثقون ان مصر بها مبدعين وحلالين مشاكل قد كدة :)
وعلى فكرة انا ممكن أكون دكتور اسنان واضع فكرة أو حل لمشكلة في المرور مثلا
وممكن أكون عامل بسيط واضع حل لمشكلة بتواجهنا في المستشفيات كل يوم
”المصريين مبدعين  بطبعهم“
 
المشاكل المعروضة والحلول بدون حقوق ملكية
الي عاوز ياخد أي حل لأي مشكلة ياخدها ,هدفنا إفادة وحل مشاكل مصر من خلال توثيق المشاكل في مكان واحد ووضع حلول بنفس المكان
من الشعب للشعب
وبالتالي أخذ اي حلول وتطبيقها سيكون شرف لنا انها وجدت بموقعنا - حبيت تذكر أنها من خلال موقعنا يبقى كتر ألف خيرك مقولتش يبقى برده يشرفنا انك استفدت مننا.
دي الفكرة ببساطة وممكن لأي حد يشارك

طرق المشاركة :
أن تضع مشاكل غير مدرجة بالموقع
أن تضع حلول لمشاكل موجودة بالفعل بالموقع
أن تقييم الحلول والمشاكل فهذه فائده كبيرة لتحسين قوة المشاكل وحلولها في العرض للغير
ان تقوم بنشر المشاكل المختلفة على أصدقائك ومعارفك ونشر الموقع لتعميم الفائدة

أتمنى من الله أن يفيد هذا العمل مصر ويكون مرجعا لكل من يحتاجه وقدرني الله وفريق العمل على الإخلاص في تحسينه وتحديثه وقدركم الله على العطاء بوضع  مشاكل وحلول ذكية تساهم في  تطور مصر ووصولها لمكانها الطبيعي في مصاف دول العالم بأمر الله

محمد البحراوي  - صاحب الفكرة والمشروع
ومدير شركة إم إتش سايتس ( المنفذة للفكرة )
info@egproblems.com



قوانين الموقع :

* لغة الموقع الرسمية هي اللغة العربية والمصرية العامية وستحذف تعليقات الأنجلوعرب  وهناك حلول كثيرة على الإنترنت بديلة  لمن ليس لديه كيبورد عربي.
* يمنع وضع تعليقات على المشاكل المعروضة  ( فقط وضع حلول أو مقترحات إيجابية )
مثل “ فعلا المشكلة دي عندنا كل يوم في كذا .. فهدفنا تقليل التعليقات “  حتى نسهل على الغير قراءة اكبر قدر من الحلول قبل وضع حل جديد
* لتضع حل لمشكلة - برجاء قراءة التعليقات - الحلول - كلها أولا قبل إضافة حل جديد - كثرة الحلول بتكرارات غير مفيدة بالمرة, فحاول تكون إيجابي وإتعب شوية عشان مصر
* يسمح بوضع كل المشاكل الواقعية في أي ما يقابلنا في مصر بلا حرج - سياسية - دينية - صحية - أمنية - إلخ من نواحي الحياة المصرية.